1 Samuel 4
1ⲁⲥϣⲱⲡⲉ ⲇⲉ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲉⲣⲡⲟⲗⲩⲙⲟⲥ ⲙⲛ ⲡⲓ︤ⲏ︦ⲗ︥ ⲁⲩⲱ ⲡⲓ︤ⲏ︦ⲗ︥ ⲁϥⲉⲓ ⲉⲃⲟⲗ ⲉⲧⲱⲙⲛⲧ ⲉⲣⲟⲟⲩ ⲉⲡⲟⲗⲩⲙⲉⲓ ⲛⲙⲙⲁⲩ ⲁⲩⲧⲁⲁⲩ ⲉϩⲣⲁⲓ ⲉⲁⲃⲉⲛⲉⲍⲉⲣ ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲧⲁⲁⲩ ⲉϩⲣⲁⲓ ⲉⲁⲫⲉⲕ 2ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲉⲣⲉⲙⲡⲗⲁϩ ⲉⲃⲟⲗ ⲉⲡⲟⲗⲩⲙⲉⲓ ⲙⲛ ⲡⲓ︤ⲏ︦ⲗ︥ ⲡⲡⲟⲗⲩⲙⲟⲥ ⲇⲉ ⲁϥϩⲣⲟϣ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩϭⲱⲧⲡ ⲙⲡⲉⲙⲧⲟ ⲉⲃⲟⲗ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲁⲩⲡⲗⲩⲅⲏ ⲉⲃⲟⲗ ϩⲙ ⲡⲉⲙⲗⲁϩ ⲛⲧⲁϥϣⲱⲡⲉ ϩⲛ ⲧⲥⲱϣⲉ ⲛϭⲓ ϩⲙⲉ ⲛϣⲉ ⲛⲣⲱⲙⲉ 3ⲡⲗⲁⲟⲥ ⲇⲉ ⲁϥⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓ︤ⲏ︦ⲗ︥ ⲡⲉϫⲁⲩ ⲛⲛⲉⲩⲉⲣⲏⲩ ϫⲉ ⲉⲧⲃⲉ ⲟⲩ ⲡϫⲟⲉⲓⲥ ⲁϥⲑⲃⲃⲓⲟⲛ ⲙⲡⲟⲟⲩ ⲛⲁϩⲣⲁⲩ ⲛⲛⲁⲗⲗⲟⲫⲩⲗⲟⲥ ⲙⲁⲣⲉⲛϫⲓ ⲛⲧⲕⲟⲓⲃⲱⲧⲟⲥ ⲙⲡⲉⲛⲛⲟⲩⲧⲉ ⲉⲃⲟⲗ ϩⲛ ⲥⲏⲗⲱⲙ ⲥⲉⲓ ⲛⲥϭⲱ ϩⲛ ⲧⲉⲛⲙⲏⲧⲉ ⲛⲥⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲉⲛϫⲁϫⲉ 4ⲡⲗⲁⲟⲥ ⲇⲉ ⲁϥϫⲟⲟⲩ ⲉϩⲣⲁⲓ ⲉⲥⲏⲗⲱⲙ ⲁⲩϥⲓ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲣⲉⲡⲉⲭⲁⲓⲣⲟⲩⲃⲓⲛ ϩⲓϫⲱⲥ ⲁⲩⲱ ⲡϣⲏⲣⲉ ⲥⲛⲁⲩ ⲛϩⲏⲗⲓ ⲟⲫⲛⲓ ⲙⲛ ⲫⲓⲛⲉⲉⲥ ⲁⲩⲉⲓ ⲙⲛ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ 5ⲁⲥϣⲱⲡⲉ ⲇⲉ ⲛⲧⲉⲣⲉⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲡⲓ︤ⲏ︦ⲗ︥ ⲧⲏⲣϥ ⲁⲩⲉⲓ ⲉϩⲣⲁⲓ ⲉⲩⲱϣ ⲉⲃⲟⲗ ϩⲛ ⲟⲩⲛⲟϭ ⲛϩⲣⲟⲟⲩ ⲁⲩⲱ ⲡⲕⲁϩ ⲧⲏⲣϥ ⲁϥⲕⲉⲙⲧϥ 6ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲧⲙ ⲉⲡⲉⲩϩⲣⲟⲟⲩ ⲁⲩⲱ ⲡⲉϫⲁⲩ ϫⲉ ⲟⲩ ⲡⲉ ⲡⲉⲓϩⲣⲟⲟⲩ ⲛⲧⲁϥϣⲱⲡⲉ ϩⲛ ⲧⲡⲁⲣⲉⲙⲃⲟⲗⲏ ⲛⲛⲉϩⲉⲃⲣⲁⲓⲟⲥ ⲁⲩⲱ ⲁⲩⲉⲓⲙⲉ ϫⲉ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲧⲉ ⲛⲧⲁⲥⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ 7ⲛⲁⲗⲗⲟⲫⲩⲗⲟⲥ ⲇⲉ ⲁⲩⲣϩⲟⲧⲉ ⲉⲙⲁⲧⲉ ⲡⲉϫⲁⲩ ϫⲉ ⲛⲁⲓ ⲛⲉ ⲛⲉⲛⲟⲩⲧⲉ ⲛⲧⲁⲩⲉⲓ ϣⲁⲣⲟⲟⲩ ⲉⲧⲉⲩⲡⲁⲣⲉⲙⲃⲟⲗⲏ ⲟⲩⲟⲓ ⲛⲁⲛ ⲡⲉⲛϫⲟⲉⲓⲥ ⲛⲁϩⲙⲉⲛ ⲙⲡⲟⲟⲩ ϫⲉ ⲙⲡⲉⲧⲱϣ ⲛⲧⲉⲓϩⲉ ϣⲱⲡⲉ ⲛⲥⲁϥ ⲙⲛ ϣⲙⲛⲧ ⲙⲡⲟⲟⲩ ⲛϩⲟⲟⲩ 8ⲟⲩⲟⲓ ⲛⲁⲛ ⲛⲓⲙ ⲡⲉⲧⲛⲁⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲉⲓⲛⲟⲩⲧⲉ ⲉⲧϫⲟⲟⲣ ⲛⲁⲓ ⲛⲉ ⲛⲉⲛⲟⲩⲧⲉ ⲛⲧⲁⲩϣⲁⲁⲣⲉ ⲉⲕⲏⲙⲉ ϩⲙ ⲡⲗⲩⲅⲏ ⲛⲓⲙ ⲁⲩⲱ ϩⲙ ⲡϫⲁⲓⲉ ⲧⲏⲣϥ 9ⲧⲱⲕ ⲙⲙⲱⲧⲛ ⲛⲧⲉⲧⲛⲣϫⲱⲱⲣⲉ ⲛⲁⲗⲗⲟⲫⲩⲗⲟⲥ ϫⲉ ⲛⲛⲉⲧⲛⲣⲙϩⲁⲗ ⲛⲛⲉϩⲉⲃⲣⲁⲓⲟⲥ ⲕⲁⲧⲁ ⲑⲉ ⲛⲧⲁⲩⲣϩⲙϩⲁⲗ ⲛⲁⲛ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ ⲛⲧⲉⲧⲛⲙⲓϣⲉ ⲛⲙⲙⲁⲩ 10ⲁⲩⲱ ⲁⲩⲁϩⲉⲣⲁⲧⲟⲩ ⲁⲩⲙⲓϣⲉ ⲛⲙⲙⲁⲩ ⲛⲣⲱⲙⲉ ⲇⲉ ⲙⲡⲓ︤ⲏ︦ⲗ︥ ⲁⲩϭⲱⲧⲡ ⲁⲡⲟⲩⲁ ⲡⲟⲩⲁ ⲃⲱⲕ ⲉⲧⲉϥⲥⲕⲏⲛⲏ ⲁⲩⲛⲟϭ ⲉⲙⲁⲧⲉ ⲙⲡⲗⲩⲅⲏ ϣⲱⲡⲉ ⲛϩⲏⲧⲟⲩ ⲁⲩϩⲉ ⲉⲃⲟⲗ ϩⲙ ⲡⲓ︤ⲏ︦ⲗ︥ ⲛϭⲓ ϣⲟⲙⲛⲧ ⲛⲧⲃⲁ ⲙⲙⲏⲏϣⲉ 11ⲁⲩⲱ ⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲁⲩϥⲓⲧⲥ ⲁⲩⲱ ⲡϣⲏⲣⲉ ⲥⲛⲁⲩ ⲛϩⲏⲗⲓ ⲁⲩⲙⲟⲟⲩⲧⲟⲩ ⲟⲫⲛⲓ ⲙⲛ ⲫⲓⲛⲉⲉⲥ 12ⲟⲩⲣⲱⲙⲉ ⲇⲉ ⲛⲓⲉⲙⲓⲛⲁⲓⲟⲥ ⲁϥⲡⲱⲧ ⲉⲃⲟⲗ ϩⲙ ⲡⲉⲙⲗⲁϩ ⲁϥⲉⲓ ⲉϩⲣⲁⲓ ⲉⲥⲏⲗⲱⲙ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲉⲣⲉⲛⲉϥϩⲟⲉⲓⲧⲉ ⲡⲏϩ ϩⲓⲱⲱϥ ⲁⲩⲱ ⲉⲣⲉϫⲱϥ ⲙⲉϩ ⲛⲉⲓⲧⲛ 13ϩⲏⲗⲓ ⲇⲉ ⲛⲉϥϩⲙⲟⲟⲥ ⲡⲉ ϩⲓϫⲛ ⲡⲉϥⲧⲁϭⲥ ϩⲓⲣⲛ ⲧⲡⲩⲗⲏ ⲉϥϭⲱϣⲧ ⲉⲃⲟⲗ ⲉⲧⲉϩⲓⲏ ϫⲉ ⲛⲉⲣⲉⲛⲉϥϩⲏⲧ ⲡⲟϣⲥ ⲉⲃⲟⲗ ⲉⲣⲟϥ ⲉⲧⲃⲉ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲡⲣⲱⲙⲉ ⲁϥⲉⲓ ⲉϩⲟⲩⲛ ⲉⲧⲡⲗⲟⲓⲥ ⲉⲧⲁⲙⲟⲟⲩ ⲧⲡⲟⲗⲓⲥ ⲇⲉ ⲛⲧⲉⲣⲉⲥⲥⲱⲧⲙ ⲁⲥⲱϣ ⲉⲃⲟⲗ 14ⲁⲩⲱ ϩⲏⲗⲓ ⲁϥⲥⲱⲧⲙ ⲉⲡⲉϩⲣⲟⲟⲩ ⲙⲡⲱϣ ⲉⲃⲟⲗ ⲡⲉϫⲁϥ ϫⲉ ⲟⲩ ⲡⲉ ⲡⲉⲓϩⲣⲟⲟⲩ ⲙⲛ ⲡⲓⲱϣ ⲉⲃⲟⲗ ⲡⲣⲱⲙⲉ ⲇⲉ ⲁϥⲡⲱⲧ ⲁϥⲉⲓ ⲉⲧⲁⲙⲉϩⲏⲗⲓ 15ϩⲏⲗⲓ ⲇⲉ ⲛⲉⲟⲩⲣⲱⲙⲉ ⲡⲉ ⲉϥϩⲛⲡⲥⲧⲁⲓⲟ ⲛⲣⲟⲙⲡⲉ ⲛⲉϥⲃⲁⲗ ⲁⲩϩⲣⲟϣ ⲉⲣⲟϥ ⲁⲩⲱ ⲛⲉϥⲉⲓⲱⲣϩ ⲁⲛ ⲡⲉ ⲡⲉϫⲉϩⲏⲗⲉⲓ ⲇⲉ ⲛⲛⲣⲱⲙⲉ ⲉⲧⲁϩⲉⲣⲁⲧⲟⲩ ⲙⲡⲉϥⲙⲧⲟ ⲉⲃⲟⲗ ϫⲉ ⲟⲩ ⲡⲉ ⲡⲉϩⲣⲟⲟⲩ ⲙⲡⲓⲱϣ ⲉⲃⲟⲗ 16ⲁⲩⲱ ⲡⲣⲱⲙⲉ ⲁϥⲡⲱⲧ ⲁϥϯ ⲙⲡⲉϥⲟⲩⲟⲓ ⲉϩⲏⲗⲓ ⲡⲉϫⲁϥ ⲛⲁϥ ϫⲉ ⲁⲛⲟⲕ ⲡⲉ ⲡⲣⲱⲙⲉ ⲛⲧⲁⲓⲉⲓ ⲉⲃⲟⲗ ϩⲛ ⲧⲡⲁⲣⲉⲙⲃⲟⲗⲏ ⲁⲛⲟⲕ ⲡⲉ ⲛⲧⲁⲓⲡⲱⲧ ⲙⲡⲟⲟⲩ ⲉⲃⲟⲗ ϩⲙ ⲡⲉⲙⲗⲁϩ ⲡⲉϫⲉϩⲏⲗⲓ ⲛⲁϥ ϫⲉ ⲟⲩ ⲧⲉ ⲑⲉ ⲛⲧⲁⲥϣⲱⲡⲉ ⲡⲁϣⲏⲣⲉ 17ⲁⲩⲱ ⲡϩⲣϣⲓⲣⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁϥ ϫⲉ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩϭⲱⲧⲡ ϩⲏⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲁⲩⲛⲟϭ ⲛⲣⲁϩⲧⲥ ϣⲱⲡⲉ ⲙⲡⲗⲁⲟⲥ ⲁⲩⲱ ⲛⲉⲕϣⲏⲣⲉ ⲥⲛⲁⲩ ⲁⲩⲙⲟⲟⲩⲧⲟⲩ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩϥⲓⲧⲥ 18ⲁⲥϣⲱⲡⲉ ⲇⲉ ⲛⲧⲉⲣⲉϥⲣⲡⲙⲉⲉⲩⲉ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁϥϩⲉ ϫⲓⲙ ⲡⲉϥⲧⲁϭⲥ ⲛⲥⲁ ⲡⲁϩⲟⲩ ⲉϥϩⲓⲧⲟⲩⲉ ⲛⲧⲡⲩⲗⲏ ⲁⲡⲕⲁⲥ ⲛⲧⲉϥϫⲓⲥⲉ ⲟⲩⲱϫⲡ ⲁϥⲙⲟⲩ ϫⲉ ⲡⲣⲱⲙⲉ ⲟⲩϩⲗⲗⲟ ⲡⲉ ⲉⲁϥⲁⲓⲁⲓ ⲁⲩⲱ ⲛⲧⲟϥ ⲁϥⲕⲣⲓⲛⲉ ⲙⲡⲓ︤ⲏ︦ⲗ︥ ⲛϫⲟⲩⲱⲧⲉ ⲛⲣⲟⲙⲡⲉ 19ⲧⲉϥϣⲉⲗⲉⲉⲧ ⲇⲉ ⲉⲧⲉⲧⲉⲥϩⲓⲙⲉ ⲧⲉ ⲙⲫⲓⲛⲉⲉⲥ ⲡⲉϥϣⲏⲣⲉ ⲛⲉⲥϩⲟⲣϣ ⲛⲱ ⲉⲙⲓⲥⲉ ⲁⲩⲱ ⲛⲧⲉⲣⲉⲥⲥⲱⲧⲙ ⲉⲡⲟⲩⲱ ϫⲉ ⲁⲩϥⲓ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲱ ϫⲉ ⲁⲡⲉⲥϣⲟⲙ ⲙⲟⲩ ⲙⲛ ⲡⲉⲥⲕⲉϩⲁⲓ ⲁⲥⲟⲩⲉⲛⲣⲁ ⲁⲥⲣⲓⲙⲉ ⲁⲩⲱ ⲁⲥϯ ⲉⲙⲓⲥⲉ ϫⲉ ⲁⲛⲛⲁⲁⲕⲉ ϩⲙⲟⲙ ⲉϫⲱⲥ 20ⲛⲉⲥⲛⲁⲙⲟⲩ ⲇⲉ ⲡⲉ ϩⲙ ⲡϫⲱⲕ ⲙⲡⲉⲥⲁϩⲉ ⲛⲉϩⲓⲟⲙⲉ ⲇⲉ ⲉⲧⲉⲙⲡⲉⲥⲃⲟⲗ ⲡⲉϫⲁⲩ ⲛⲁⲥ ϫⲉ ⲙⲡⲉⲣⲣϩⲟⲧⲉ ϫⲉ ⲟⲩϣⲏⲣⲉ ⲡⲉⲧⲉⲣⲛⲁⲙⲁⲥⲧϥ ⲁⲩⲱ ⲙⲡⲉⲥⲉⲣⲟⲩⲱ ⲛⲁⲩ ⲙⲡⲉⲡⲉⲥϩⲏⲧ ⲣⲱ ⲛⲏⲫⲉ 21ⲛⲉϩⲓⲟⲙⲉ ⲇⲉ ⲁⲩⲙⲟⲩⲧⲉ ⲉⲡⲣⲁⲛ ⲙⲡϣⲏⲣⲉ ⲕⲟⲩⲓ ϫⲉ ⲟⲩⲁⲓ ⲃⲁⲣⲭⲁⲃⲱⲑ ⲉⲧⲉⲡⲉϥⲟⲩⲱϩⲙ ⲡⲉ ϫⲉ ⲉⲧⲃⲉ ⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲱ ⲉⲧⲃⲉ ⲡⲉⲥϣⲟⲙ ⲁⲩⲱ ⲉⲧⲃⲉ ⲡⲉⲥⲕⲉϩⲁⲓ 22ⲉⲩϫⲱ ⲙⲙⲟⲥ ϫⲉ ⲡⲉⲟⲟⲩ ⲙⲡⲓ︤ⲏ︦ⲗ︥ ⲁⲩⲡⲟⲟⲛⲉϥ ⲉⲃⲟⲗ ϩⲙ ⲡⲧⲣⲉⲩϫⲓ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ
Copyright information for
CopSahBible2